Kushtet e përdorimit

Këto kushte vlejnë për përdorimin e Numrat.com dhe për blerjen e paketave të paguara. Përditësuar më 30 shtator 2026.

Kush e ofron shërbimin

Numrat.com operohet nga Creative Corner Agency LLC, shoqëri e regjistruar në Shtetet e Bashkuara të Amerikës. Kur blen një paketë të paguar, shitësi dhe pala me të cilën lidh marrëveshjen është Creative Corner Agency LLC.

Informacioni në drejtori

Numrat ofron informacion kontakti për biznese. Përpiqemi që të dhënat të jenë të sakta, por nuk garantojmë se çdo numër është aktiv në çdo moment.

Listimi i paguar është reklamë. Ai nuk është verifikim, nuk është vlerësim dhe nuk nënkupton rekomandim nga Numrat.

Numrat nuk garanton pozicione në Google, numër telefonatash apo klientë.

Paketat e paguara

Paketat Bazë, Premium dhe Ultra janë abonime mujore. Çmimi është ai që shfaqet te faqja e paketave në momentin e blerjes, në euro (EUR). Çfarë përfshin secila paketë shihet po aty.

Pagesa me kartelë përpunohet nga Stripe. Numrat nuk e sheh dhe nuk e ruan numrin e kartelës. Meqë shitësi është në SHBA, banka jote mund të aplikojë tarifë për pagesë ndërkombëtare ose për konvertim valute.

Paketa aktivizohet sapo Stripe konfirmon pagesën, zakonisht brenda një minute.

Rinovimi dhe anulimi

Abonimi rinovohet automatikisht çdo muaj dhe kartela tarifohet në fillim të çdo periudhe, derisa ta anulosh. Nëse një pagesë rinovimi dështon, Stripe e provon përsëri disa herë; nëse nuk kalon, paketa mbaron në fund të periudhës së paguar.

Abonimin mund ta anulosh kur të duash, te paneli i biznesit, me butonin Menaxho pagesën. Anulimi hyn në fuqi në fund të periudhës së paguar: deri atëherë paketa mbetet aktive dhe pas saj nuk tarifohesh më.

Rimbursimet

Pagesat nuk rimbursohen. Kur e anulon abonimin, nuk tarifohesh më për muajt në vijim dhe paketa vazhdon deri në fund të muajit të paguar.

Raste të veçanta, për shembull një tarifim i gabuar, i shqyrtojmë një nga një: na shkruaj te kontakti. Vendimi për një rimbursim merret sipas gjykimit tonë. Nëse një pagesë rimbursohet plotësisht, paketa që ajo bleu mbaron.

Ndryshimi i çmimeve

Nëse çmimi i një pakete ndryshon, abonentët njoftohen me email të paktën 30 ditë përpara. Çmimi i ri vlen nga rinovimi i parë pas asaj date.

Paketa Elitë

Paketa Elitë nuk ka çmim të publikuar. Çmimi dhe kushtet e saj caktohen me marrëveshje të veçantë dhe paguhen me faturë.

Kontakt

Për pyetje mbi pagesat, faturat ose këto kushte, na shkruaj te kontakti.