Privatësia

Si i trajton Numrat të dhënat e vizitorëve, të llogarive dhe të pagesave. Përditësuar më 2 tetor 2026.

Kush është përgjegjës

Numrat.com operohet nga Creative Corner Agency LLC, shoqëri e regjistruar në Shtetet e Bashkuara të Amerikës. Për çdo pyetje mbi të dhënat, na shkruaj te kontakti.

Çfarë publikohet

Numrat publikon vetëm kontakte biznesi të destinuara për publikun. Nuk publikohen numra privatë.

Çfarë ruajmë për vizitorët

Për të zgjedhur seksionin e shtetit ruhet një cookie e thjeshtë, numrat_vendi, për 180 ditë. Adresa IP e plotë nuk ruhet për këtë qëllim.

Që të të shfaqim së pari shtetin tënd, nga adresa IP nxjerrim vetëm shtetin, me një bazë të dhënash që ndodhet te serveri ynë, pa e dërguar IP-në askund. IP-ja nuk ruhet dhe nuk regjistrohet. Shteti që zgjedh vetë ka gjithmonë përparësi. IP Geolocation by DB-IP.

Për raportimet ruhet një gjurmë e hashuar, jo IP-ja, vetëm për të kufizuar abuzimin. Kërkimet pa rezultat ruhen vetëm si numër i përgjithshëm, pa identifikues vizitori.

Numërimi i vizitave te serveri ynë

Numrat numëron vetë, pa cookie, faqet e hapura dhe klikimet te butonat e një biznesi (telefono, WhatsApp, Viber, Navigo, website, Shpërndaj). Ruhen vetëm numra të përgjithshëm sipas ditës: lloji i faqes, shteti i përafërt, faqja nga erdhe, lloji i pajisjes dhe adresa e faqes. Që një vizitor të numërohet një herë në ditë, ruhet për 3 ditë një gjurmë e hashuar me kripë nga IP-ja dhe shfletuesi, kurrë vetë IP-ja. Këto numra i sheh vetëm stafi i Numrat; pronari i një biznesi sheh vetëm numrat e biznesit të vet.

Statistikat e vizitave (Google Analytics)

Për të kuptuar sa njerëz e përdorin Numrat dhe cilat faqe u duhen më shumë, përdorim Google Analytics të Google LLC. Ai vendos dy cookie, _ga dhe _ga_MKGQ0J7GV4, që zgjasin deri në 2 vjet, dhe regjistron faqet e vizituara, faqen nga erdhe, llojin e shfletuesit dhe të pajisjes, si dhe vendndodhjen e përafërt. Google Analytics nuk e ruan adresën IP.

Funksionet e reklamave dhe Google Signals janë të fikura, dhe këto të dhëna nuk përdoren për reklama. Të dhënat e detajuara fshihen pas 2 muajsh. Nëse shfletuesi yt dërgon sinjalin Global Privacy Control, Google Analytics nuk ngarkohet fare. Për vizitorët nga Zona Ekonomike Evropiane, Mbretëria e Bashkuar dhe Zvicra nuk vendoset asnjë cookie statistikash. Ekranet e stafit dhe paneli i pronarit të biznesit nuk e përdorin Google Analytics. Google i trajton këto të dhëna sipas politikës së vet të privatësisë.

Llogaritë

Për një llogari ruajmë emailin, emrin nëse e jep, fjalëkalimin vetëm si hash dhe, nëse hyn me Google, lidhjen me atë llogari. Kontaktet që ruan te Numrat e mi i sheh vetëm ti: nuk publikohen dhe nuk shfaqen në ekranet e stafit. Nga faqja e llogarisë mund t'i shkarkosh të dhënat e tua ose ta fshish llogarinë.

Pagesat

Pagesat me kartelë i përpunon Stripe. Të dhënat e kartelës i fut direkt në faqen e Stripe: Numrat nuk e sheh dhe nuk e ruan numrin e kartelës. Stripe i trajton ato sipas politikës së vet të privatësisë.

Numrat ruan vetëm atë që duhet për llogarinë e biznesit: identifikuesit e klientit dhe të abonimit te Stripe, paketën, shumën, monedhën, datat dhe gjendjen e faturave, pagesave dhe rimbursimeve. Emaili i llogarisë i jepet Stripe që të dërgojë faturat dhe dëftesat.

Korrigjim dhe heqje

Për të korrigjuar ose hequr një listim, na shkruaj te kontakti.